skip to content
 
နေပြည်တော်၊ စက်တင်ဘာ (၄)ရက်။    
 
၂၀၁၉ခုနှစ်၊ ၀န်ကြီးဌာနပေါင်းစုံ ဘော်လီဘော(အမျိုးသား/အမျိုးသမီး)ပြိုင်ပွဲဖွင့်ပွဲအခမ်းအနားကို ယနေ့နံနက်(၉)နာရီအချိန်တွင် ၀ဏ္ဏသိဒ္ဓိအားကစားရုံ(B)၌ကျင်းပပြုလုပ်ရာ မြန်မာနိုင်ငံအမျိုးသားအိုလံပစ်ကောင်စီအဖွဲ့၀င်ဖြစ်သော ပြန်ကြားရေး၀န်ကြီးဌာန ဒုတိယ၀န်ကြီး ဦးအောင်လှထွန်း၊ မြန်မာနိုင်ငံအမျိုးသား အိုလံပစ်ကောင်စီအတွင်းရေးမှူး၊ ကျန်းမာရေးနှင့် အားကစား၀န်ကြီးဌာန ဒုတိယ၀န်ကြီးဒေါက်တာ မြလေးစိန်၊ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်၊ ကျန်းမာရေးနှင့်အားကစား၀န်ကြီးဌာန ဒုတိယအမြဲတမ်းအတွင်း၀န် ဦးမြသန်းထိုက်၊    အားကစားနှင့်ကာယပညာဦးစီးဌာန ဒုတိယညွှန်ကြားရေးမှူးချုပ်များဖြစ်ကြသော ဦးထွန်းမြင့်ဦး၊ ဦးကျော်ဆန်း၊ ဦးကျော်ဦး၊ ဌာနဆိုင်ရာများမှတာ၀န်ရှိသူများ၊ မြန်မာနိုင်ငံဘော်လီဘောအဖွဲ့ချုပ်မှတာ၀န်ရှိသူများ၊ ပြိုင်ပွဲ၀င်အုပ်ချုပ်သူနည်းပြများနှင့် အားကစားသမားများ တက်ရောက်ခဲ့ကြသည်။
 
 
 
အစီအစဉ်အရ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်မှ အဖွင့်အမှာစကားပြောကြားရာတွင် ၀န်ကြီးဌာနအသီးသီးမှ၀န်ထမ်းများအတွက် အပန်းဖြေမှု၊ ပျော်ရွှင်မှု၊ စည်းလုံးမှုနှင့် ချစ်ခင်မှုရရှိစေရေး ၀န်ထမ်းများတတ်ကြွရွှင်လန်းစွာဖြင့် မိမိတို့တာ၀န်များကို ပိုမိုထမ်းရွက်နိုင်စေရေးတို့ဖြစ်ပါကြောင်း၊ ပြိုင်ပွဲမှာကြီးကြပ်တဲ့ဒိုင်လူကြီးများအနေနှင့်လည်း ဘက်လိုက်မှုကင်းရှင်းပြီး ပြိုင်ပွဲစည်းမျဉ်း/စည်းကမ်းများအတိုင်း တရားမျှတမှန်ကန်စွာ တိတိကျကျဆုံးဖြတ်ဆောင်ရွက်သွားကြစေလို ကြောင်း၊ ယခုပြိုင်ပွဲမှတဆင့် ကျန်းမာကြံ့ခိုင်ပြီးအရည်အသွေး၊ အရည်အချင်းထက်မြတ်မြင့်မားသည့် ပြည်သူ့၀န်ထမ်းကောင်းများဖြစ်လာအောင်  ကြိုးပမ်းဆောင်ရွက်သွားစေလိုကြောင်း ပြောကြားရင်း ၂၀၁၉ခုနှစ်၊ ၀န်ကြီးဌာနပေါင်းစုံ ဘော်လီဘော(အမျိုးသား/အမျိုးသမီး)ပြိုင်ပွဲအား ဖွင့်လှစ်ပေးခဲ့သည်။
 
 
 
ထို့နောက် မြန်မာနိုင်ငံအမျိုးသားအိုလံပစ်ကောင်စီအဖွဲ့၀င်ဖြစ်သော ပြန်ကြားရေး၀န်ကြီးဌာန ဒုတိယ၀န်ကြီး ဦးအောင်လှထွန်း၊  အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်နှင့် တာ၀န်ရှိသူများမှ ပြိုင်ပွဲ၀င်အုပ်ချုပ်သူများနှင့်အားကစားသမားများအား ရင်းရင်းနှီးနှီးလိုက်လံနှုတ်ဆက်ခဲ့သည်။
 
ယနေ့ပွဲစဉ်အဖြစ် ပြည်ထဲရေး၀န်ကြီးဌာနအသင်းနှင့် ကျန်းမာရေးနှင့်အားကစား၀န်ကြီးဌာနအသင်းတို့ ယှဉ်ပြိုင်ကစားနေမှုများအား  မြန်မာနိုင်ငံအမျိုးသားအိုလံပစ်ကောင်စီအဖွဲ့၀င်ဖြစ်သော ပြန်ကြားရေး၀န်ကြီးဌာန ဒုတိယ၀န်ကြီး ဦးအောင်လှထွန်း၊ မြန်မာနိုင်ငံအမျိုးသားအိုလံပစ်ကောင်စီအတွင်းရေးမှူး၊ ကျန်းမာရေးနှင့်အားကစား၀န်ကြီးဌာန ဒုတိယ၀န်ကြီး ဒေါက်တာမြလေးစိန်၊ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်၊ ဌာနဆိုင်ရာများမှ တာ၀န်ရှိသူများနှင့်၀န်ထမ်းများ ကြည့်ရှုအားပေးခဲ့ကြရာ ပြည်ထဲရေး၀န်ကြီးဌာနအသင်းမှ (၂၅-၁၀)မှတ်၊ (၂၅-၁၅)မှတ်၊ (၂၅-၂၀)မှတ် ဖြင့်လည်းကောင်း အနိုင်ရရှိသွားပါသည်။
 
၂၀၁၉ခုနှစ်၊ ၀န်ကြီးဌာနပေါင်းစုံ ဘော်လီဘော(အမျိုးသား/အမျိုးသမီး)ပြိုင်ပွဲကို ပြိုင်ပွဲ၀င်အသင်း အမျိုးသား(၇)သင်း၊ အမျိုးသမီး(၄)သင်း၊ ပြိုင်ပွဲ၀င်ကစားသမား စုစုပေါင်း(၁၆၅)ဦး ၀င်ရောက် ယှဉ်ပြိုင်ကစားလျက်ရှိပြီး အဆိုပါပြိုင်ပွဲအား (၄.၉.၂၀၁၉)ရက်နေ့မှ (၁၃.၉.၂၀၁၉)ရက်နေ့အထိ နေ့စဉ် နံနက်(၈)နာရီမှစ၍  ၀ဏ္ဏသိဒ္ဓိအားကစားရုံ(B)တွင် ယှဉ်ပြိုင်ကစားကြမည်ဖြစ်ပြီး ဘော်လီဘောအားကစားနည်းကို စိတ်ပါ၀င်စားသောမိဘပြည်သူများအနေဖြင့် မည်သူမဆိုအခမဲ့လာရောက် ကြည့်ရှုနိုင်ပါကြောင်း သတင်းရရှိပါသည်။
 
  • 6 reads
  • Printer-friendly version

back to top
Eng