မြိတ် ဇန်န၀ါရီ ၂။
တနင်္သာရီတိုင်းဒေသကြီး မြိတ်မြို့တွင် မြန်မာ့ရိုးရာလက်ဝှေ့ မျိုးဆက်သစ်အားကစားသမားများပေါ်ထွန်းလာစေရေးနှင့် အားကစားက႑ဖွံ့ဖြိုးတိုးတက်ရေးအတွက် Township Spots Development Program အစီအစဉ်ဖြင့် မြို့နယ်အားကစားနှင့်ကာယပညာကော်မတီဥက္ကဌဖလား ဖိတ်ခေါ်မြန်မာ့ရိုးရာလက်ဝှေ့ပြိုင်ပွဲကို မြိတ်ခရိုင် အားကစားခန်းမတွင် နှစ်ရက်ကြာ ကျင်းပခဲ့ကြောင်း သိရသည်။
“ မြန်မာ့ရိုးရာလက်ဝှေ့အားကစားကို မြိတ်မြို့နယ်မှ တနင်္သာရီတိုင်းဒေသကြီး လက်ရွေးစင်အားကစားသမားများနှင့် နိုင်ငံ့လက်ရွေးစင် အမျိုးသားသုံးဦး၊ အမျိုးသမီးနှစ်ဦးကို မွေးထုတ်ပေးနိုင်ခဲ့ပါတယ်”ဟု တနင်္သာရီ တိုင်းဒေသကြီးလက်ဝှေ့ဆပ်ကော်မတီအတွင်းရေးမှူး ဦးမြဝေက ပြောသည်။
အဆိုပါ လက်ဝှေ့ပြိုင်ပွဲကို ဒီဇင်ဘာ ၃၁ ရက်နှင့် ဇန်န၀ါရီလ ၁ ရက်တွင် ကျင်းပခဲ့ပြီး ပြိုင်ပွဲတွင် လူသစ်တန်းပြိုင်ပွဲ၊ ၀ါသနာရှင်ပြိုင်ပွဲနှင့် အထူးပြိုင်ပွဲများကို ကျင်းပခဲ့ရာ ၀ါသနာရှင်နှင့်လူသစ်တန်းတွင် ပြိုင်ပွဲခုနှစ်ပွဲနှင့် အထူးပွဲသုံးပွဲကျင်းပခဲ့ပြီး ပြိုင်ပွဲအမျိုးအစားအလိုက် ဆုကြေးငွေများကို ပြိုင်ပွဲ၀င်များအား ပြိုင်ပွဲကျင်းပရေးကော်မတီမှ ချီးမြှင့်ခဲ့ကြောင်း သိရသည်။
ကြေးမုံသတင်းစာမှ ကောက်နှုတ်ဖော်ပြသည်။