နေပြည်တော်၊ ဒီဇင်ဘာလ(၂၈)ရက်။
ကျန်းမာရေးနှင့်အားကစားဝန်ကြီးဌာန အားကစားနှင့် ကာယပညာဦးစီးဌာနမှ ကြီးမှူး၍ မြန်မာ့အားကစား အစဉ်အမြဲ တိုးတက်စေရေးနှင့် မျိုးဆက်သစ် အားကစားသမားများ စဉ်ဆက်မပြတ် ပေါ်ထွက်လာစေရန် ရည်ရွယ်ဖွင့်လှစ် ထားသော အားကစားနှင့်ကာယပညာသိပ္ပံ (ရန်ကုန်၊ မန္တလေး၊ မော်လမြိုင်၊တောင်ကြီး) ကျောင်းများ၏ ၂ဝ၁၇-၂ဝ၁၈ ပညာသင်နှစ် အားကစားပြိုင်ပွဲများအား ယနေ့နံနက် (၆း၃ဝ) အချိန်တွင် စတင်ကျင်းပရာ ဝဏ္ဏသိဒ္ဓိပြေးခုန်ပစ်ကွင်း၌ ကျင်းပသော ပြေးခုန်ပစ်ပြိုင်ပွဲများအား အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်နှင့် တာဝန်ရှိသူများက ကြည့်ရှုအားပေးပြီး အမျိုးသမီး မီတာ (၅ဝဝဝ)လမ်းလျှောက်ပြိုင်ပွဲတွင် ယခင်စံချိန် (၂၈မိနစ)(ဝဝ.ဝ၆)စက္ကန့်ကို ယခုနှစ် ဇင်ထက်မေ အား/ကာသိပ္ပံ(တောင်ကြီး)မှ (၂၆)မိနစ် (၁၈.၉၈) စက္ကန့်ဖြင့် စံချိန်သစ်တင်ခဲ့ပြီး အမျိုးသားမီတာ(၅ဝဝဝ) လမ်းလျှောက် ပြိုင်ပွဲတွင် ယခင်စံချိန် (၂၃)မိနစ်(၅၆.၂၉)စက္ကန့်ကို ယခုနှစ် မိုင်းညီညီမိုး အား/ကာသိပ္ပံ (တောင်ကြီး)မှ (၂၂)မိနစ်(၄၃.၅၈)စက္ကန့်ဖြင့်စံချိန်သစ်တင်ခဲ့သည်။ဆက်လက်၍ တန်းမြင့်ခုန်(ကျား/မ)ပြိုင်ပွဲ၊ မီတာ(၄ဝဝ)တန်းကျော်ပြေး(ကျား/မ)ပြိုင်ပွဲ၊ သံပြားဝိုင်းပစ်(ကျား/မ)ပြိုင်ပွဲ၊ မီတာ(၂ဝဝ) (ကျား/မ)ပြိုင်ပွဲ၊ အလျားခုန်(ကျား/မ)ပြိုင်ပွဲ၊ မီတာ(၁၅ဝဝ)(ကျား/မ)ပြိုင်ပွဲများကို ကျင်းပ ပြုလုပ်ခဲ့သည်။
ဆက်လက်၍ ဝဏ္ဏသိဒ္ဓိစက်ဘီးလေ့ကျင့်ရေးကွင်းတွင် ကျင်းပလျက်ရှိသော အမျိုးသမီးမီတာ (၅ဝဝ) တစ်ဦးချင်းစံချိန်ပြုပြိုင်ပွဲတွင် ယခင်စံချိန်(၄၁.၇၇)စက္ကန့်ကို ယခုနှစ် ကျော့ကေခိုင်အား/ကာသိပ္ပံ (မန္တလေး)မှ (၄၁.၇၄)ဖြင့်လည်းကောင်း၊ အမျိုးသမီးအသင်းလိုက် (၂၁)ကီလိုမီတာစံချိန်ပြုပြိုင်ပွဲတွင် ယခင်စံချိန်(၃၄)မိနစ် (၂၈.၉၄)စက္ကန့်ကို အား/ကာသိပ္ပံ (မန္တလေး)မှ(၃၂)မိနစ် (၄၉.၆၉)စက္ကန့်ဖြင့်လည်းကောင်း၊ အမျိုးသားအသင်းလိုက် (၃ဝ)ကီလိုမီတာစံချိန်ပြုပြိုင်ပွဲတွင် ယခင်စံချိန်(၄၁)မိနစ်(ဝ၁.၁၁)စက္ကန့်ကို အား/ကာ(ရန်ကုန်) မှ(၄ဝ)မိနစ် (၂၅.၅ဝ)စက္ကန့်ဖြင့်လည်းကောင်း၊ အမျိုးသမီး(၃)ကီလိုမီတာစံချိန်ပြုပြိုင်ပွဲတွင် ယခင်စံချိန်(၄)မိနစ် (၄ဝ.ဝဝ)စက္ကန့်ကို ကျော့ကေခိုင် အား/ကာသိပ္ပံ(မန္တလေး) (၄)မိနစ်(၃၃.၇၁)စက္ကန့်၊ ဝေဝေထွန်းအား/ကာ(ရန်ကုန်) (၄)မိနစ် (၃၆.၁၂)စက္ကန့်၊ စုလင်းလဲ့အား/ကာ(ရန်ကုန်)မှ (၄)မိနစ် (၃၉.၅၁)စက္ကန့်ဖြင့်လည်းကောင်း၊ အမျိုးသမီး(၉)ကီလိုမီတာအသင်းလိုက်စံချိန်ပြုပြိုင်ပွဲတွင် ယခင်စံချိန်(၁၄)မိနစ် (၁၈.၁၁)စက္ကန့် ကိုအား/ကာသိပ္ပံ(မန္တလေး)မှ (၁၃)မိနစ် (၄၆.၄၃)စက္ကန့်ဖြင့်လည်းကောင်း၊ အမျိုးသား(၁၅) ကီလိုမီတာပြိုင်ပွဲတွင် ယခင်စံချိန် (၂ဝ)မိနစ် (ဝ၉.၂၈)စက္ကန့်ကို ယခုနှစ် (၁၉)မိနစ် (၄ဝ.၂ဝ) စက္ကန့်ဖြင့်လည်းကောင်း အသီးသီးစံချိန်သစ်တင်နိုင်ခဲ့သည်။
ဆက်လက်၍ ညွှန်ကြားရေးမှူးချုပ်သည် နံနက်(၁ဝ)နာရီအချိန်တွင် လယ်ဝေးအားကစားလေ့ကျင့်ရေးစခန်း TC-2 ၌ကျင်းပလျက်ရှိသော အလေးမပြိုင်ပွဲ ဗိုလ်လုပွဲ စဉ်များအား ကြည့်ရှုအားပေးခဲ့သည်။
ဆက်လက်၍ TC-1 လေ့ကျင့်ရေးရုံ၌ အမျိုးသမီးဘောလီဘောပြိုင်ပွဲတွင် အား/ကာသိပ္ပံ(မန္တလေး)အသင်းနှင့် အား/ကာသိပ္ပံ(မော်လမြိုင်)အသင်း၊ အား/ကာသိပ္ပံ (ရန်ကုန်)နှင့် အား/ကာသိပ္ပံ(တောင်ကြီး)၊ အမျိုးသားဘော်လီလောပြိုင်ပွဲတွင် အား/ကာသိပ္ပံ (မန္တလေး)အသင်းနှင့် အား/ကာသိပ္ပံ(မော်လမြိုင်)အသင်း၊ အား/ကာသိပ္ပံ (ရန်ကုန်)အသင်းနှင့် အား/ကာသိပ္ပံ(တောင်ကြီး)အသင်းတို့ အသီးသီး ယှဉ်ပြိုင်ခဲ့သည်။
ဆက်လက်၍ Cluster (3) လေ့ကျင့်ရေးရုံ၌ စားပွဲတင်တင်းနစ်ပြိုင်ပွဲကိုလည်းကောင်း၊ TC-1 လေ့ကျင့်ရေးရုံ၌ တိုက်ကွမ်ဒိုပြိုင်ပွဲကို လည်းကောင်း၊ ဝဏ္ဏသိဒ္ဓိရေကူးကန်၌ ရေကူးပြိုင်ပွဲကိုလည်းကောင်း၊ TC-1 လေ့ကျင့်ရေးရုံ၌ ပိုက်ကျော်ခြင်းပြိုင်ပွဲကိုလည်းကောင်း၊ TC-1 လက်ဝှေ့ပြိုင်ပွဲရုံ၌ လက်ဝှေ့ပြိုင်ပွဲများကို အသီးသီး ကျင်းပပြုလုပ်ခဲ့ပါသည်။
ယင်းနောက် ပြေးခုန်ပစ်ပြိုင်ပွဲ၊ စက်ဘီးပြိုင်ပွဲ၊ တိုက်ကွမ်ဒိုပြိုင်ပွဲ၊ ရေကူးပြိုင်ပွဲ၊ အလေးမပြိုင်ပွဲများတွင် ဆုရရှိသူများအား တာဝန်ရှိသူများမှ အသီးသီးဆုများ ပေးအပ်ချီးမြှင့်ခဲ့ကြောင်း သတင်းရရှိသည်။
