ဝန်းသို
တစ်မျိုးသားလုံးကျန်းမာကြံ့ခိုင်စေရန်နှင့် အားကစားကို ပြည်သူအားလုံးပူးပေါင်းဆောင်ရွက်လာစေရန် အတွက် ဒီဇင်ဘာအားကစားလ(ဒုတိယပတ်) လူထုစုပေါင်းလမ်းလျှောက်ပွဲနှင့် ကိုယ်လက်လှုပ်ရှား ဆေးတစ်ပါး (Exercise Medicine)လှုပ်ရှားမှုကို ယနေ့ နံနက် ၅ နာရီအချိန်က စစ်ကိုင်းတိုင်းဒေသကြီး၊ ကသာခရိုင်၊ ဝန်းသိုမြို့နယ်တွင် ကျင်းပပြုလုပ်သည်။
အဆိုပါလမ်းလျှောက်ပွဲသို့ တိုင်းဒေသကြီးလွှတ်တော်ကိုယ်စားလှယ် ဒေါ်ခိုင်ခိုင်ဝင်း၊ ခေတ္တမြို့နယ် အုပ်ချုပ်ရေးမှူး ဦးမြသိန်းထွန်းနှင့် ဌာနဆိုင်ရာအကြီးအကဲများ၊ ဝန်ထမ်းများ၊ ဆရာ၊ ဆရာမများနှင့် ကျောင်းသား ကျောင်းသူများ၊ ပြည်သူများ အင်အား ၅၅၀ ဦးခန့်တို့က မြို့နယ်အထွေထွေ အုပ်ချုပ်ရေးဦးစီးဌာနရုံးရှေ့ စုရပ်မှတာထွက်ကာ အမှတ်(၁၁၁) ခြေမြန်တပ်ရင်းထိ တပျော်တပါး လမ်းလျှောက်ခဲ့ကြပြီး မြို့မ အားကစားကွင်း၌ ကိုယ်လက်လှုပ်ရှားဆေးတစ်ပါး အစီအစဉ် (Fitness Dance) အကဖြင့် ကိုယ်ကာယ လေ့ကျင့်ခန်းများကို စုပေါင်း၍ပြုလုပ်ခဲ့ကြသည်။
အဆိုပါ လမ်းလျှောက်ပွဲသို့လာရောက်ကြသော တာဝန်ရှိသူများ၊ အားကစားဝါသနာရှင်များနှင့် ကျောင်းသား၊ ကျောင်းသူများအား ကောက်ညှင်းပေါင်းနှင့် အကြော်ကျွေးမွေးဧည့်ခံခဲ့ကြောင်း သိရသည်။
ကျော်မြိုင် (ပြန်/ဆက်)