မန္တလေး ၂၂ ဒီဇင်ဘာ
ကျန်းမာရေးနှင့် အားကစားဝန်ကြီးဌာန၊ မန္တလေးမြို့တော် စည်ပင်သာယာရေးကော်မတီနှင့် တိုင်းဒေသကြီး ပြေးခုန်ပစ်အဖွဲ့ချုပ်တို့ ပူးပေါင်း၍ "ကျန်းမာပျော်ရွှင်ဆင်လို့နွှဲ မန်းတောင်ရိပ်က မာရသွန်ပွဲ" ဆောင်ပုဒ်ဖြင့် ဒုတိယအကြိမ် မာရသွန် အပြေးပြိုင်ပွဲ 100 Plus Activ Mandalay City Run 2019 ကို ယနေ့ နံနက် ၅ နာရီခွဲတွင် မန္တလေးမြို့ မြို့တော်စည်ပင်သာယာရေး ကော်မတီရုံးရှေ့ တာထွက်စုရပ်နေရာ၌ ကျင်းပခဲ့သည်။
ရှေးဦးစွာ ပြိုင်ပွဲဝင် အပြေးသမားများက စုရပ်နေရာတွင် သွေးပူလေ့ကျင့်ခန်းများ စုပေါင်းပြုလုပ်ဆောင်ရွက်ကြပြီး နံနက် ၅ နာရီခွဲတွင် တာထွက်စုရပ်နေရာ၌ ၁၅ ကီလိုမီတာ အလွတ်တန်း အမျိုးသား အမျိုးသမီး အပြေးပြိုင်ပွဲကို မန္တလေးတိုင်း ဒေသကြီးလွှတ်တော် ဒုတိယဥက္ကဋ္ဌ ဒေါက်တာခင်မောင်ဌေး၊ အားကစားနှင့် ကာယပညာဦးစီးဌာန ဒုတိယညွှန်ကြားရေးမှူးချုပ် ဦးထွန်းမြင့်ဦးနှင့် F&N myanmar ၏ Country Manager Mr.Freddy oh တို့က ဖဲကြိုးဖြတ်ဖွင့်လှစ်ပေးသည်။
ထို့နောက် အစိုးရအဖွဲ့ဝင်ဝန်ကြီးများနှင့်အတူ တာထွက်အလံမြောက်၍ တာလွှတ်ခဲ့ရာ အပြေးအားကစား မောင်မယ် ၁၅၀ဝ ကျော်တို့က စုရပ်မှ ၂၆ လမ်းအတိုင်း ကျုံးအနောက်ဘက်၊ ကျုံးမြောက်ဘက်လမ်းမှ ဂေါက်ကွင်းလမ်းအတိုင်း မန္တလေးတောင်ကိုပတ်ကာ ၆၂ လမ်းမှ သတ်မှတ်လမ်းကြောင်းအတိုင်း ၂၆ လမ်းရှိ တာလွှတ်စုရပ်သို့ ယှဉ်ပြိုင်ကြပြီး ပန်းဝင်ခဲ့ကြသည်။
ဆက်လက်၍ ၉ ကီလိုမီတာ အမျိုးသား အမျိုးသမီး ကျုံးတစ်ပတ်အပြေးပြိုင်ပွဲကို နံနက် ၆ နာရီတွင် ကျင်းပခဲ့ပြီး ပြိုင်ပွဲဝင် ၂၄၀ဝ ကျော်တို့က သတ်မှတ်လမ်းကြောင်းအတိုင်း ကျုံးတစ်ပတ်ယှဉ်ပြိုင်ပြေးကာ တာထွက်စုရပ်နေရာသို့ ပန်းဝင်ခဲ့ရာ တာဝန်ရှိသူတို့က ဆုဆွဲပြားများ၊ 100 Pluss အချိုရည်ဘူးများ၊ ရေသန့်ဘူးများဖြင့် ကြိုဆိုခဲ့ကြသည်။
ဆုချီးမြှင့်ပွဲ၌ တိုင်းဒေသကြီးလွှတ်တော် ဒုတိယဥက္ကဋ္ဌ ဒေါက်တာခင်မောင်ဌေးက ၁၅ ကီလိုမီတာပြိုင်ပွဲ အမျိုးသားတွင် ပထမဆု ဇာနည်ထွန်း၊ ဒုတိယဆု Anogak ၊ တတိယဆု စန်းနိုင်၊ စတုထ္ထဆု ဝင်းနိုင်ထွန်းနှင့် ပဉ္စမဆု ပန်းလေတို့ကို လည်းကောင်း၊ ၁၅ ကီလိုတန်း အမျိုးသမီးပြိုင်ပွဲတွင် တိုင်းဒေသကြီး လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ကျော်ကျော်မင်းက ပထမဆု အေးအေးသန်း၊ ဒုတိယဆု ခင်မာဆယ်၊ တတိယဆု ငါးမယ်၊ စတုထ္ထဆု မြင့်မြင့်အေးနှင့် ပဉ္စမဆု Aregay တို့ကိုလည်းကောင်း၊ ဦးဆုံးပန်းဝင်သူ အမျိုးသား အမျိုးသမီး ၅ ဦးအတွက် ပထမဆု ငွေကျပ် ၁၀ သိန်း၊ ဒုတိယဆု ငွေကျပ် ၈ သိန်း၊ တတိယဆု ငွေကျပ် ၅ သိန်း၊ စတုထ္ထနှင့် ပဉ္စမဆုငွေကျပ် တစ်သိန်းစီတို့ကို ပေးအပ်ခဲ့သည်။
ထို့နောက် ၉ ကီလိုမီတာ အပြေးပြိုင်ပွဲ အမျိုသားတွင် ပထမဆု သန်းထွန်းအောင်၊ ဒုတိယဆု သန်းစိုး၊ တတိယဆု ကျော်ငွေသန်း၊ စတုထ္ထဆု သဲမောင်မောင်နှင့် ပဉ္စမဆု ကျော်သီဟ တို့ကလည်းကောင်း၊ အမျိုးသမီး ၉ မီတာပြိုင်ပွဲတွင် ပထမဆု အေးအိအိဟန်၊ ဒုတိယဆု သီရိစိုး၊ တတိယဆု မဖြိုး၊ စတုထ္ထဆု မြတ်နိုးမန်းနှင့် ပဉ္စမဆု Carolire တို့ကလည်းကောင်း၊ ဦးဆုံး ပန်းဝင်သူများဖြစ်သော အမျိုးသား ၅ ဦးနှင့် အမျိုးသမီး ၅ ဦးစီအတွက် ပထမဆု ငွေကျပ် ၅ သိန်း၊ ဒုတိယဆု ငွေကျပ် ၃ သိန်း၊ တတိယဆု ငွေကျပ် ၂ သိန်းနှင့် စတုထ္ထနှင့် ပဉ္စမဆု ငွေကျပ် ၁ သိန်းစီတို့ကို တာဝန်ရှိသူများက ပေးအပ်ချီးမြှင့်ခဲ့ကြသည်။
တင်မောင်(မန်းကိုယ်ပွား)