၂ ဒီဇင်ဘာ
ဖိလစ်ပိုင်နိုင်ငံက အိမ်ရှင်အဖြစ် လက်ခံကျင်းပလျက်ရှိသည့် ၂၀၁၉ ဆီးဂိမ်းစ်ပြိုင်ပွဲ၏ ဝူရှူးပြိုင်ပွဲ ဒုတိယနေ့ကို ယနေ့နံနက်ပိုင်းနှင့် ညနေပိုင်းက မနီလာမြို့ရှိ World Trade Center ၌ ဆက်လက်ကျင်းပသည်။ မြန်မာဝူရှူးအဖွဲ့သည် ဒုတိယနေ့တွင် ဆန်းဆိုပြိုင်ပွဲ၌ ကြေးတံဆိပ်နှစ်ခု ရယူနိုင်ခဲ့သည်။
နံနက်ပိုင်းတွင် ထောက်လုပွဲစဉ်များ ဆက်လက်ကျင်းပခဲ့ပြီး အမျိုးသားထိုက်ချိကျန့်ပြိုင်ပွဲတွင် ငြိမ်းချမ်းကိုကို (မြန်မာ) သည် ၉ ဒသမ ၃၈ မှတ်ဖြင့် အဆင့် (၇) သာရခဲ့ပြီး မလေးရှားက ရွှေတံဆိပ်၊ ဖိလစ်ပိုင်က ငွေတံဆိပ်နှင့် ဘရူနိုင်းက ကြေးတံဆိပ်ရခဲ့သည်။ အမျိုးသား နန်းတောင်း+နန်းကွန့်ပြိုင်ပွဲနှစ်ခုပေါင်း၏ ဒုတိယပွဲဖြစ်သော နန်းကွန့်ပြိုင်ပွဲတွင် မြန်မာကစားသမား သိန်းသန်းဦး ဝင်ရောက်ယှဉ်ပြိုင်ရာ စုစုပေါင်း ၁၉ ဒသမ ၂၂၀ မှတ်ဖြင့် အဆင့် (၄) သာရခဲ့ပြီး ဘရူနိုင်းက ရွှေတံဆိပ်၊ အင်ဒိုနီးရှားက ငွေတံဆိပ်၊ ဗီယက်နမ်က ကြေးတံဆိပ်ရခဲ့သည်။ အမျိုးသား တောင်းစု+ ကွန့်စုပြိုင်ပွဲနှစ်ခုပေါင်း၏ ပထမပွဲစဉ်ဖြစ်သော တောင်းစုပြိုင်ပွဲတွင် မြန်မာကစားသမား မျိုးမင်းကြီးက ၉ ဒသမ ၅၄ မှတ်ဖြင့် အဆင့် (၈) နေရာတွင် ရပ်တည်နေသည်။
ညနေပိုင်းတွင် ဆန်းဆို (အတိုက်) ပွဲစဉ်များ ဆက်လက်ကျင်းပခဲ့ပြီး အမျိုးသား ၄၈ ကီလိုတန်းတွင် အောင်မျိုးထွန်းနှင့် အမျိုးသား ၆၅ ကီလိုတန်းတွင် ချစ်ကိုကိုတို့မှာ ဆီမီးဖိုင်နယ်တွင် အရေးနိမ့်ပြီး ပူးတွဲကြေးတံဆိပ်များ ရရှိခဲ့သည်။
သတင်း-ညီမြတ်သော်တာ
