ရန်ကုန်၊ ဒီဇင်ဘာ ၂၁
၂၀၁၉ ခုနှစ်တွင်ကျင်းပမည့် အာဆီယံအဆင့်ပြိုင်ပွဲများတွင် မြန်မာအသင်းများ ၀င်ရောက်ယှဉ်ပြိုင်မည်ဖြစ်သည်။
အာဆီယံ ဘောလုံးအဖွဲ့ချုပ်သည် ဒီဇင်ဘာ ဒုတိယပတ်ကကျင်းပသည့် ကောင်စီအစည်းအဝေးတွင် ပြိုင်ပွဲကျင်းပမည့်ရက်တို့ကို အတည်ပြုခဲ့ခြင်းဖြစ်ပြီး ပြိုင်ပွဲစုစုပေါင်း ခြောက်ခုကျင်းပမည်ဖြစ်သည်။
ပြိုင်ပွဲများအဖြစ်ကျင်းပမည့် အာဆီယံ ယူ-၂၂ ပြိုင်ပွဲကို ဖေဖော်ပါရီ ၁၈ ရက်မှ မတ် ၂ ရက်အထိ ကမ္ဘောဒီးယားနိုင်ငံ၌လည်းကောင်း၊ အာဆီယံ ယူ-၁၅ အမျိုးသမီးပြိုင်ပွဲကို မေ ၁၀ ရက်မှ ၂၂ ရက်အထိ ထိုင်းနိုင်ငံ၌လည်းကောင်း၊ အာဆီယံ ယူ-၁၅ အမျိုးသားပြိုင်ပွဲကို ဇူလိုင် ၂၂ရက်မှ သြဂုတ်လ ၉ ရက်အထိ ထိုင်းနိုင်ငံ၌လည်းကောင်း၊ အာဆီယံ ယူ-၁၈ ပြိုင်ပွဲကို သြဂုတ် ၄ ရက်မှ ၁၈ ရက်အထိ ဗီယက်နမ်နိုင်ငံ၌လည်းကောင်း၊ အာဆီယံအမျိုးသမီးပြိုင်ပွဲကို သြဂုတ် ၁၆ ရက်မှ ၂၇ ရက်အထိ ထိုင်းနိုင်ငံ၌လည်းကောင်း၊ အာဆီယံဖူဆယ် ပြိုင်ပွဲကို အောက်တိုဘာ ၁၄ ရက်မှ ၂၇ ရက်အထိ ဗီယက်နမ်နိုင်ငံ၌လည်းကောင်း ကျင်းပသွားမည်ဖြစ်သည်။
မြန်မာအသင်းသည် ပြိုင်ပွဲအားလုံးတွင် ၀င်ရောက်ယှဉ်ပြိုင်သွားမည်ဖြစ်ပြီး ပါ၀င်ယှဉ်ပြိုင်မည့်အသင်းအများစုမှာ လေ့ကျင့်မှုများပြုလုပ်လျက်ရှိသည်။
၂၀၁၉ ခုနှစ်တွင် ပထမဆုံးပြိုင်ပွဲအဖြစ် အာဆီယံ ယူ-၂၂ ပြိုင်ပွဲကို ကျင်းပမည်ဖြစ်ပြီး ဆီးဂိမ်းပြိုင်ပွဲမတိုင်မီ ကျင်းပသောကြောင့် အသင်းအများစုမှာ ဆီးဂိမ်းအသင်းများဖြင့် ယှဉ်ပြိုင်မည်ဖြစ်သည်။
မြန်မာ ယူ-၂၂ အသင်းသည် ပြီးခဲ့သည့်ရက်ပိုင်းက ဗီယက်နမ်ဖိတ်ခေါ်ပြိုင်ပွဲသို့ ပါ၀င်ယှဉ်ပြိုင်ခဲ့ရာ ဒုတိယဆုရရှိခဲ့ပြီး ယင်းပြိုင်ပွဲ အပါအ၀င် မတ်လတွင် ယှဉ်ပြိုင်ရမည့် အာရှ ယူ-၂၃ ခြေစစ်ပွဲအတွက်လည်း ယခုလအတွင်း၌ ပြန်လည်လေ့ကျင့်သွားမည်ဖြစ်ကြောင်းသိရသည်။
