skip to content
 
နေပြည်တော်၊အောက်တိုဘာလ(၂၅)ရက်။
 
ကျန်းမာရေးနှင့် အားကစားဝန်ကြီးဌာန၊ အားကစားနှင့်ကာယပညာဦးစီးဌာနမှ ကြီးမှူး၍ မြန်မာ့အားကစား အစဉ်အမြဲတိုးတက်စေရန်နှင့် မျိုးဆက်သစ် အားကစားသမားများ စဉ်ဆက်မပြတ် ပေါ်ထွက်လာစေရန် ရည်ရွယ်၍ ဖွင့်လှစ်ထားသော အားကစားနှင့်ကာယပညာသိပ္ပံ (ရန်ကုန်၊ မန္တလေး၊ တောင်ကြီး၊ မော်လမြိုင်၊ လွိုင်ကော်၊ မုံရွာ)ကျောင်းများ၏ ၂ဝ၁၈-၂ဝ၁၉ ပညာသင်နှစ် အားကစားပြိုင်ပွဲများအား ယနေ့နံနက် (၆:ဝဝ) နာရီအချိန်တွင် ဝဏ္ဏသိဒ္ဓိအားကစားကွင်း၌ ကျင်းပပြုလုပ်ရာ အားကစားနှင့်ကာယပညာဦးစီးဌာန ညွှန်ကြားရေးမှူးချုပ်ဦးမျိုးလှိုင်၊ ဒုတိယညွှန်ကြားရေး မှူးချုပ်များနှင့်တာဝန်ရှိသူများ၊ အားကစားနှင့်ကာယပညာသိပ္ပံကျောင်းများမှ ကျောင်းအုပ်ကြီးများ တက်ရောက်ကြည့်ရှု အားပေးကြပါသည်။
 
 
ဆက်လက်၍ ပြေးခုန်ပစ်ပြိုင်ပွဲတွင် မီတာ(၈ဝဝ) (ကျား/မ)၊ မီတာ(၁ဝဝ) (ကျား/မ)၊ သံလုံးပစ်(ကျား/မ)၊ သုံးဆင့်ခုန်(ကျား/မ)၊ မီတာ(၂ဝဝဝ)တားဆီးကျော်ပြေး(ကျား/မ)၊ မီတာ (၄ဝဝ x ၄)လက်ဆင့်ကမ်း (ကျား/မ)ပြိုင်ပွဲများကို ယှဉ်ပြိုင်ကစားကြပြီး ပြိုင်ပွဲများအပြီးဆုရရှိသော အားကစားသမားများကို အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်နှင့်တာဝန်ရှိသူများမှ ဆုများအသီးသီးပေးအပ်ချီးမြှင့်ခဲ့ပြီး အမျိုးသား/အမျိုးသမီး ဘော်လီဘောပြိုင်ပွဲ ယှဉ်ပြိုင်နေမှုအား ကြည့်ရှုအားပေးခဲ့ပါသည်။
 
 
ဆက်လက်၍ ဘောလုံးပြိုင်ပွဲ(မ)၊ ဘတ်စကက်ဘောပြိုင်ပွဲ၊ လက်ဝှေ့ပြိုင်ပွဲ၊  စားပွဲတင်တင်းနစ်ပြိုင်ပွဲ(ကျား/မ)၊ တင်းနစ်ပြိုင်ပွဲ (ကျား/မ)နှင့် ပိုက်ကျော်ခြင်းပြိုင်ပွဲများကို  သက်ဆိုင်ရာ အားကစားကွင်း/ရုံ အသီးသီး၌ ယှဉ်ပြိုင်ကစားခဲ့ပါသည်။
 
 
 
ဆက်လက်၍ နေ့လည်ပိုင်းတွင် လယ်ဝေးမြို့ရှိ အားကစားလေ့ကျင့်ရေးစခန်း-၂ (TC-2)တွင် ကျင်းပလျက်ရှိသော  အလေးမပြိုင်ပွဲနှင့် ဝူရှူးပြိုင်ပွဲများယှဉ်ပြိုင်နေမှုအား ကြည့်ရှုအားပေးခဲ့ပြီး ပြိုင်ပွဲများအပြီး ဆုရရှိသောအားကစားသမားများကို အားကစားနှင့် ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်နှင့်တာဝန်ရှိသူများမှ ဆုများအသီးသီး ပေးအပ် ချီးမြှင့်ခဲ့ကြောင်း သတင်းရရှိပါသည်။
 
အဆိုပါ၂ဝ၁၈-၂ဝ၁၉ ပညာသင်နှစ်၊ အားကစားနှင့်ကာယပညာသိပ္ပံ (ရန်ကုန်၊ မန္တလေး၊ တောင်ကြီး၊ မော်လမြိုင်၊ လွိုင်ကော်၊ မုံရွာ) ကျောင်းများ၏ အားကစားပြိုင်ပွဲများကို (၂၁.၁ဝ.၂ဝ၁၈)ရက်နေ့မှ(၃ဝ.၁ဝ.၂ဝ၁၈)ရက်နေ့အထိ နေ့စဉ် နံနက်(၇:၃ဝ) နာရီ အချိန်မှစတင်ပြီး သက်ဆိုင်ရာအားကစားကွင်း/ရုံ အသီးသီးတို့၌ ယှဉ်ပြိုင်ကစားကြမည် ဖြစ်ပါသဖြင့် အားကစားကို စိတ်ပါဝင်စားသော မိဘပြည်သူများအနေဖြင့် မည်သူမဆို အခမဲ့ လာရောက်ကြည့်ရှုနိုင်ပါကြောင်း သိရှိရပါသည်။
 
  • 6 reads
  • Printer-friendly version

back to top
Eng