Judicial College အဆောက်အဦ (၂) ပန္နက်တော်တင် တွင်းတော်ဝန်း မင်္ဂလာအခမ်းအနား ကျင်းပ
နေပြည်တော်၊ ဒီဇင်ဘာ ၆
ပြည်ထောင်စုတရားလွှတ်တော်ချုပ် Judicial College အဆောက်အဦ (၂) ပန္နက်တော်တင် တွင်းတော်ဝန်း မင်္ဂလာအခမ်းအနားကို နေပြည်တော်ကောင်စီနယ်မြေ၊ ဥတ္တရသီရိမြို့နယ်၊ ဇဝနသိဒ္ဓိရပ်ကွက်၊ နေကြာလမ်းရှိ အဆိုပါ အဆောက်အဦ တည်ဆောက်မည့်နေရာ မင်္ဂလာ မဏ္ဍပ်၌ ယနေ့နံနက် (၀၈:၀၀) နာရီအချိန်က ကျန်းမာရေးနှင့်အားကစားဝန်ကြီးဌာနက ထုတ်ပြန်ထားသည့် COVID -19 ရောဂါကာကွယ်တားဆီးရေးဆိုင်ရာ လမ်းညွှန်ချက်များနှင့်အညီ ကျင်းပပြုလုပ်ရာ ပြည်ထောင်စုတရားသူကြီးချုပ် ဦးထွန်းထွန်းဦး တက်ရောက်ခဲ့သည်။
အခမ်းအနားတွင် ပြည်ထောင်စုတရားလွှတ်တော်ချုပ် တရားသူကြီးများ ဖြစ်ကြသည့် ဦးသာဌေး၊ ဦးမြင့်အောင်၊ ဦးအောင်ဇော်သိန်း၊ ဦးမြဟန်၊ ဦးမျိုးတင့်၊ ဦးစိုးနိုင်၊ ဦးခင်မောင်ကြည်၊ ဦးမျိုးဝင်းတို့က ပန္နက်တော်တင် တွင်းတော်ဝန်းပြီး အမွှေးနံ့သာများ ပက်ဖျန်းပေးကြသည်။
ထို့နောက် ပြည်ထောင်စုတရားသူကြီးချုပ် ဦးထွန်းထွန်းဦးက ပန္နက်တော်တင် တွင်းတော်ဝန်း အောင်မြင်ခြင်း အထိမ်းအမှတ်အဖြစ် ထုံးတမ်းအစဉ်အလာအတိုင်း ဆောင်ရွက်ပေးပြီး ရတနာ ရွှေမိုးငွေမိုး ရွာသွန်းပေးခဲ့သည်။
ဆက်လက်၍ ပြည်ထောင်စုတရားသူကြီးချုပ်သည် တာဝန်ရှိသူများနှင့်အတူ Judicial College အဆောက်အဦ (၂) ဆောက်လုပ်မည့် ပရဝုဏ်အတွင်း လှည့်လည် ကြည့်ရှုခဲ့သည်။
အဆိုပါ Judicial College အဆောက်အဦ (၂) ကို ပြည်ထောင်စုတရားလွှတ်တော်ချုပ်မှ အကောင်အထည်ဖော် ဆောင်ရွက်နေသည့် ၂၀၁၈ - ၂၀၂၂ (၅) နှစ်တာ တရားစီရင်ရေး မဟာဗျူဟာစီမံကိန်း၊ တတိယနှစ်လုပ်ငန်းအစီအစဉ် (၂၀၂၀) ၏ မဟာဗျူဟာ လုပ်ငန်းနယ်ပယ် (၄)၊ မဟာဗျူဟာ ရည်မှန်းချက် ၄.၄၊ မဟာဗျူဟာ အစီအစဉ် ၄.၄.၁ နှင့်အညီ စီမံကိန်း ချမှတ် အကောင်အထည်ဖော် ဆောင်ရွက်ခဲ့ခြင်းဖြစ်သည်။
ယင်းအဆောက်အဦမှာ အလျား (၁၆၄) ပေ၊ အနံ (၁၂၆) ပေရှိ သံကူကွန်ကရစ် သုံးထပ် အဆောက်အဦဖြစ်ပြီး ဆောက်လုပ်ရေးဝန်ကြီးဌာန အဆောက်အဦ ဦးစီးဌာန၊ အဆောက်အဦ အထူးအဖွဲ့ (၄) က တာဝန်ယူ တည်ဆောက်သွားမည်ဖြစ်သည်။